Dadku kala ayaan roon Ama kala aqoon dheer Ama kala asluub weyn Haddaan eed la doonayn Ama deeq Ilaahay Asaraar ka taagnayn
Dadku eexo kaa gelin Inan yahay la’aantaa Dumar lama abuureen Gabadh lama ammaaneen Jacayl looma ooyeen.
Geed beer udgoon iyo Ku dhex-yaal ugbaadoo Ubax iyo man fuulaay Ulihii madheedhkee Iimey ku yaalliyo Ilo wada xareedoo Nafta lagu illaawaay Dayaxoo iftiimoo Arladoo dhan gadhoo Afar iyo tobnaadaay. Qorraxdoo aroortii Dhulka soo abbaartoo Sagal iid dhex joogtaay
Waxaad tahay adduunyada Dhexda udubka haystoo Xejiyoo adkeeyoo Af-gobaadsan maayoo Qurux lama amaahdee Ashkir geenyo ugubeey. Adhaxdiyo laf-dhabartiyo Sanbabbada agtoodiyo Ililaha halbowlaha Eebaa ku mudanoo Arrintii cuslaatoo Naftu aammusnaantii Iimaansan weydoo, Amaleey jacaylkii Soo dhaafyey uurkoo Afku haysan waayoo Goortaan ogaadee
Arammidu dillaacdaan Ooddii ka leexshee Axdi jaba abaal luma
Kaa eegi maayee Igadh iyo maqaarkeed Innagoo ahaannaan Hadalkii ku ururshee Adiguna dheh aammiin
Dulucda
Maanso jacayl oo Hadraawi u tiriyey gabadh la yidhaahdo Amal
Maxamed Ibraahim Warsame Hadraawi
Eeg taariikhdooda iyo gabayada kale →